N’Uviéu, a 9 de payares del 2016, na sede de PODEMOS, cuando son les 18:40 h. axúntase’l Círculu «Asturies polo público» pa tratar los asuntos darréu:
1) Camudamientu de la Llei del Principáu d’Asturies d’ordenación de la función pública.
2) Procedimentu pal trabayu col grupu parllamentariu.
3) Encamientos y entrugues.
Asisten 15 persones.
1) Faíse un resume de cómo surdió nel Círculu la iniciativa pa camudar la llei d’ordenación de la función pública y de los trabayos fechos dende esi momentu. L’asuntu entama en resultancia de los contautos que caltién ún de los miembros del Cículu cola diputada de Podemos, Lorena Gil, al rodiu de l’actividá parllamentaria tocante al control del sector públicu asturianu y al fechu conseñau de que la contratación de los sos direutivos faise pente medies d’empresese particulares; y de que tanto esti como’l restu del personal contrátase ensin respeutu a los principios de méritu y capacidá. Trátabase, entós, d’alcontrar la meyor manera d’acabar con esta situación. Podía facese al traviés d’una «proposición non de llei» (PNL) o d’una proposición de llei. En viendo que’l Gobiernu fai poco o nengún casu a les PNL, tómase’l determín de dir pel segundu camín: la proposicion de llei, encargánose a ún de los miembros del Cículu la so preparación. Una vegada fecha, tresmitióse a tol Círculu en xeneral y a Enrique López,en particular, pola so condición de Diputáu.
Dempués d’esti resume, toma la pallabra Enrique, qu’informa d'una proposición de llei de PODEMOS de camudamientu de la d’ordenación de la función pública y de cómo foi valtiada na Xunta Xeneral. Tamién de que’l grupu parllamentariu ta desendolcando una iniciativa que coincide cola del Círculu, anque-y paez qu’eso nun quita pa qu’esta tamién se ponga en marcha, yá qu’al ser un proposicion de llei, si se-y da’l preste, al Gobiernu nun-y quedará más que afayase pa con ella. Na so opinión, anque a la espera de ver si ye posible el trámite, cree que lo meyor ye que se fáiga pel de «llectura única», que ye muncho más rápidu.
Dempués d’unes intervenciones sobre’l conteníu de la proposición de llei, el Círculu dala por bona.
Como’l GP yá tien constancia d’ella y Enrique diz que s’encarga él de «movela», tómase’l determín de que nun fai falta mandar esti alcuerdu al grupu.
Ente esti asuntu ya’l que va darréu, faense unos comentarios sobre cómo dalgunos vieron l’aición de les diputaes y diputaos de PODEMOS na Xunta Xeneral hasta esti momentu. Apaeceran nel caberu puntu d’esti acta.
2) Procedimientu pal trabayu col grupu parllamentariu.
Trés d'un resume de lo fecho tocante a esta cuestión; y como’l procedimientu yá ye conocíu porque se tresmitió enantes al Círculu, pásase direutamente a les intervenciones.
Hai acuerdu nel so conteníu, anque dempués de dalgunes pallabres, ente elles les d’Enrique, vese que pa los casos d’entrugues ya inteperllaciones parllamentaries, esi métodu nun va poder siguise, pues d’estes cuestiones tiense conocencia los llunes y les sesiones parllamentaries tienen llugar los xueve y vienres. Coméntase, entós, que lo meyor ye que los diputaos contauten direutamente coles persones que-yos paezan más afayadices, que llueu estes informen al Círculu y que, n’otru momentu, los diputaos pasen per él pa facer lo mesmo. Delles intervenciones destaquen la importancia que tien esto cabero, pues ye la manera de que’l Círculu puea facer un siguimientu de los asuntos nos qu’intervién y, si ye’l casu, ameyorar la manera de trabayar.
Tocante a esti acuerdu, quédase en facer lo mesmo que nel anterior y poles mesmes circunstancies.
3) Encamientos y preguntes.
Entámase con delles pallabres crítiques pa cola aición de les diputaes y diputaos de PODEMOS na Xuna Xeneral, pues, dicen, que se-yos ve perbien afayaos pa col sistema de funcionamientu de la Xunta y qu’eso nun ye lo que s’esperba d’ellos; teníen de ser más «rompedores». Enrique diz que ta d’acuerdu, pero que les regles tán puestes y que si se quier facer daqué hai que lo facer d’acuerdu con elles. Él, diz, ye partidariu de que, en viendo esta situación, hai qu’actuar na Xunta y na cai; que la presión na cai tien que-yos dar fuercia a los diputaos na Xunta.
Darreú siguen les crítiques con un par de pallabres comentando que’l grupu parllamentariu nun tien en cuenta’l Círculu. Enrique entruga si los demás piensen asina, dándose, entós, estremaes opiniones, anque non tán crítiques. Lo que nun se discute ye que’l Círculu, como se dexó ver nel puntu anterior, nun tien conocencia de en qué paren los asuntos nos que intervienen los sos miembros y eso nun espeya que’l GP caltenga un bon contautu col Círculu. Enrique tamién tien quexes no tocante al llabor del Círculu y pon como exemplu qu’encamentó'l so sofitu pa facer un analís de la Llei de Presupuestos y ensin resultáu dalgunu. De siguío coméntase que los círculos tán perdiendo pesu no tocante a cuestiones polítiques. Enrique diz que pola so parte fadrá tolo que puea pa que nun vuelvan dase estos problemas. Hai una cabera pallabra que plantega les rellaciones Círculos-Conseyu Ciudadanu-GP y l’acumulamientu de cargos: Si se ta, por exemplu, nel Conseyu Ciudadanu ¿pues tase al empar nel GP? Dalgunos dicen qu’eso ye una bona tema p’alderique.
Acábase la xunta con una intervención tocante a la funcionarización del personal llaboral y a la reesultancia de les conversaciones calteníes col Direutor Xeneral de la Función Pública sobre esta cuestión, que nun dió solución dalguna.
Llevántase la xunta cuando son les 20:30 h.
